10.10.07

kuyaw... kuyaw...

morag gusto na kong motuo nga aduna ko'y ESP; bitaw, dugay-dugay na pud baya nga sa dili mapatin-aw nga sitwasyon, mukalit la'g dasdas sa akuang isip ang mga eksena nga dili pa nahitabo sa gitawag na real time. kaniadtong buhi pa ang akong inahan, maglagot jud siya ug kanang pananglitan naa ko'y ihisgot niya nga dili dayon masayran kay wa pa lagi mahitabo. kas-a nabunalan ko, busa sukad niadto ako na lang ipangadye ang ingon nianang mga dasdas . di na ko layhang i-istorya pa kay di nako gustong masuko ang akong gwapa kaayong inahan.

unya karong mga panahuna, murag nalibat ko samtang nanan-aw sa noontime show kang channel 2 nga WOWOWEE. ingon ni willie nga bongga jud kuno ang 1st anniversary nila kay daghan kunong kwartang ipanghatag! palakpakan ang mga studio audience sa ingang paghisgot; apan sa akong kalisang, samtang nadunggan pa nako ang show , murag hingkalit ug kablurred ang tv, unya ako jung nakit-ang daghanang mga tawo nga nagtinulura'y unya murag kilat nahimong pula ug itom ang screen! nanlibarut ang akong balhibo! UNSA MAN 'TO???? hingsiagit ko! 'UNSA MAN 'TO???'

unsa man 'to? na, mao . mura ko'g nabuang ug gamay nga untag nasabtan nako ang akong naeksperyensyang paranormal, basig naa ko'y nabuhat. unya, motuo kaha sila? kaniadtong hing-aging byernes, nakakita na sab ko... samtang nag-ingon si willie ug : 'kwes-tune!', diha'y tulo ka unipormadong mga lalaki nga hing-posas niya! klaro kaayo... kagahapon lang, wa hingbutho si willie sa iyahang show. ngano man? nagsakit kuno... kaha???

No comments: